15:45 | 04.04.18 | Նորություններ | 5494

«Մայքրոսոֆթ»-ը կաջակցի ՀՀ թվային օրակարգի իրականացմանը

«Մայքրոսոֆթ»-ը պատրաստ է աջակցելու Հայաստանին՝ թվային օրակարգի իրականացման եւ այդ բնագավառում իր հարուստ փորձն ու կարողությունները փոխանցելու գործում:

Այս մասին հայտարարել է Մայքրոսոֆթ» ընկերության ԱՊՀ տարածաշրջանի ներկայացուցչության նախագահ Ռոնալդ Բինկոֆսկին՝ ՀՀ վարչապետ Կարեն Կարապետյանի հետ հանդիպման ժամանակ:


Հանդիպման ընթացքում քննարկվել են Հայաստանի թվային օրակարգի ձեւավորման ուղղությամբ ՀՀ կառավարության, մասնավորապես, «Թվային Հայաստան» հիմնադրամի եւ «Մայքրոսոֆթ»-ի միջեւ համագործակցությանն առնչվող հարցեր:


Կարեն Կարապետյանը կարեւորել է Հայաստանի թվային օրակարգի իրականացումն ու այդ գործում «Մայքրոսոֆթ»-ի հետ համատեղ գործակցությունը:


Ռոնալդ Բինկոֆսկին էլ ներկայացրել է պետական կառավարման եւ տեղական ինքնակառավարման ոլորտներում թվային համակարգի զարգացման, էլեկտրոնային եղանակով մատուցվող ծառայությունների ավելացման, պետական կառավարման էլեկտրոնային ինտեգրված համակարգի մշակման ուղղությամբ տարբեր առաջարկություններ: