14:49 | 15.02.18 | Նորություններ | 5367

ՀՀ հեռավոր բնակավայրերում այլընտրանքային լոկալ ցանցեր են ստեղծվել

Ամփոփվել են CAST փորձարարական նախագծի արդյունքները, որի նպատակն էր այլընտրանքային լոկալ ցանցեր ստեղծել Հայաստանի հեռավոր բնակավայրերում, որտեղ ինտերնետը դժվար հասանելի է, խնդրահարույց կամ պարզապես ոչ մատչելի։

Ծրագիրն իրականացրել են հայ-բրիտանական WICASTR ստարտափը, Միացյալ Թագավորության Կենտրոնական Լենքշր համալսարանը (UCLAN) եւ Impact Hub Yerevan-ը:

CAST-ը, որի մեկնարկը տրվել էր դեռեւս 2016-ին, օգտագործել է WICASTR-ի տեխնոլոգիան Հայաստանի հեռավոր գյուղերում անկախ եւ ապակենտրոնացված ցանցեր ստեղծելու եւ բնակիչներին օֆլայն մեդիա բովանդակություն տրամադրելու համար։

Նախագծի շրջանակում ընտրվել են Լեռնապատ, Կամարիս եւ Լճաշեն գյուղերը, որտեղ տեղադրվել են WICASTR-ի 26 սարքերը՝ բնակիչներին հնարավորություն տալով իրենց սմարթ հեռախոսների Wi-Fi-ի միջոցով օգտվել հետաքրքրող մեդիա բովանդակությունից (թերթեր, հաղորդումներ, աուդիո եւ վիդեո նյութեր, համայնքին վերաբերող տեղական նորություններ), ինչպես նաեւ հայտարարությունների եւ առք ու վաճառքի ընդհանուր հարթակից։

CASТ-ը հայ-բրիտանական WICASTR ստարտափի նախագիծն է, որը ստեղծում է կապի եւ տեղեկատվության ստացման այլընտրանքային ու մատչելի ճանապարհ՝ հնարավորություն տալով մարդկանց լինել տեղեկացված՝ անկախ նրանց գտնվելու վայրից: